曼城、車仔公布世冠盃名單　多位球星被踢走

英超兩大豪門曼城同車路士即將出戰世冠盃，周三(11日)公布大軍名單，基亞利殊、基爾獲加、祖奧菲歷斯、史達寧等多位著名球星未有入選，勢必遭到「清洗」命運。

曼城公布27人世冠盃名單，連同周三最後關頭加盟嘅荷蘭中場雷恩達斯，加上艾洛利、巴迪尼利同卓基4位新兵全部上榜，但基亞利殊同基爾獲加兩名英格蘭國腳就冇份。基爾獲加上季被外借去AC米蘭，早已經唔喺曼城未來計劃之中，而基亞利殊亦被掛牌出售。

至於車路士嘅人滿之患就更加嚴重，外借結束歸隊嘅史達寧、祖奧菲歷斯、迪沙斯同柏度域都冇份入選，4位球星嘅總轉會費高達1.5億鎊。史達寧上季被外借阿仙奴前，已被褫奪球衣號碼，依家祖奧菲歷斯嘅14號亦被新兵達里奧艾素高搶走。