拜仁轉移目標　搶「尼威」領先阿仙奴

拜仁慕尼黑收購科利安華迪斯嘅計劃觸礁後，據報依家轉移目標，將斥巨資收購畢爾包翼鋒尼高拉斯威廉斯。呢位西班牙新星原本係阿仙奴心頭好，不過報道指拜仁依家處於領先位置，有望遲嚟先上岸。

德國《圖片報》報道，拜仁今夏撥出巨額預算去買攻擊球員，買唔到科利安華迪斯後，依家就向威廉斯埋手。22歲嘅威廉斯合約內有6,000萬歐元「買斷條款」，雖然睇落好似「好抵」，但呢筆違約金需要一次過支付，加上威廉斯索取超過30萬歐元周薪，高價成本令阿仙奴等買家遲遲未出手，而拜仁就有足夠財力去承擔呢次轉會操作。

威廉斯係西班牙國家隊主力，同拉明耶馬雙翼齊飛，上季喺畢爾包各項賽事有11個入波同7次助攻，被譽為歐洲最佳翼鋒之一。拜仁除全力收購威廉斯外，拉菲爾利亞奧同巴特利巴高拿都係後備人選。