【官宣】王者駕到！奇雲迪布尼簽拿玻里2年

今個夏天結束10年曼城光輝歲月嘅奇雲迪布尼，將會喺意大利展開新一頁，周四(12日)宣布自由身加盟意甲冠軍拿玻里，雙方簽約2年。新一季奇雲迪布尼會為拿玻里出戰歐聯，有機會同曼城碰頭。

拿玻里喺社交網公布奇雲迪布尼加盟消息，並用AI整咗張奇雲迪布尼登上王座嘅圖，宣布「王者駕臨」。拿玻里主席迪羅倫迪斯亦喺自己嘅社交網，貼上同呢位比利時球星嘅握手合照。

據報33歲嘅奇雲迪布尼拒絕咗芝加哥火焰等4支美職球會斟介，亦推咗沙特球會嘅豐厚聘約，希望繼續喺最高水平賽事逐鹿。拿玻里陣中有唔少前英超球星，包括麥湯米尼、盧卡古等等，教練干地亦曾執教車路士同熱刺。