華荷域想加盟曼聯　價錢抵到爛

曼聯簽入狼隊射手馬菲奧斯根夏之後，仍然未夠喉，準備繼續收購前鋒，根據英國媒體《GIVEMESPORT》爆料，祖雲達斯射手杜辛華荷域希望成「魔」，加上佢只剩下1年合約，估計曼聯只需要用2,000萬鎊(約2.1億港元)，就可以買到呢位25歲塞爾維亞國腳。

據悉曼聯現時有3位前鋒收購人選，包括士砵亭射手約基利斯，賓福特前鋒麥比奧莫，但兩人身價不菲，其中士砵亭要求8,000萬歐元(約7.2億港元)轉會費，紅魔鬼財政欠佳，未必能夠承擔。

此外，熱刺近日加入爭奪麥比奧莫，曼聯要簽入呢位喀麥隆國腳亦唔容易。雖然曼聯仲有「Plan B」就係向拿玻里收購域陀奧森漢，但起碼要支付7,500萬歐元轉會費，令交易遲遲未能成事。

《GIVEMESPORT》指杜辛華荷域嘅經理人近日聯絡曼聯管理層，向對方推薦呢位射手，要求20萬鎊周薪個人待遇條件，最關鍵係杜辛華荷域明夏約滿，祖記難以吊高來賣，估計只要有2,000萬鎊轉會費，就可以成交。

不過，杜辛華荷域今季為祖雲達斯上陣41場僅入15球及5次助攻，表現未如理想，令人擔憂佢一旦成「魔」，可能成為「海倫2.0」。