皮奧利即將「劈炮」　回巢執教費倫天拿

根據「轉會權威」記者羅曼諾(Fabrizio Romano)爆料，艾納斯教練皮奧利即將辭職，並會重返意甲，執教費倫天拿，甚至已制定組軍大計，首要目標簽入費倫巴治嘅39歲老將迪斯高。

皮奧利上年9月成為艾納斯主帥，但球隊成績仍然令人失望，再次四大皆空，聯賽排第3位，無緣下屆亞冠精英盃，早已盛傳呢位59歲意大利名帥好可能被炒，最新消息指皮奧利已經決定離隊，準備接手執教費倫天拿。

事實上，皮奧利同費倫天拿關係密切，球員時代曾於1989至95年效力呢支「紫百合」，並於2017至19年擔任球隊主帥，其後轉投AC米蘭，最威水係協助A米奪得2021/22年球季意甲冠軍。費倫天拿教練柏拿甸奴上月辭職後，會方希望邀請皮奧利回巢執教，雙方好大機會達成協議。

據悉皮奧利一旦成為費倫天拿主帥，就會爭取簽入前鋒迪斯高，呢位波斯尼亞國腳曾效力曼城、國際米蘭等球會，佢今季為費倫巴治上陣53場入21球，仍然寶刀未老。