拿玻里又有收穫　達雲紐尼斯同意加盟

意甲冠軍拿玻里繼簽入曼城中場奇雲迪布尼之後，準備再迎接另1位英超球星，根據意大利媒傳爆料，拿玻里已經接觸利物浦前鋒達雲紐尼斯嘅經理人，討論簽入呢位烏拉圭國腳嘅可能性，達雲紐尼斯為爭取更多上陣機會，初步同意加盟。

即將26歲嘅達雲紐尼斯3年前以近1億歐元(約9.1億港元)轉會費由賓菲加加盟利物浦，但一直踢唔出身價，今季更加淪為後備，只入7球及7次助攻，多次傳出紅軍準備出售佢，根據《Transfermarkt》資訊，達雲紐尼斯現時僅值4,500萬歐元(約4.1億港元)。

由於利物浦計劃以破英超轉會費紀錄嘅1.27億鎊(約13.5億港元)，收購利華古遜中場科利安華迪斯，預料會賣走部分球員籌集資金，除咗達雲紐尼斯之外，亦可能出售另1位前鋒路易斯迪亞斯，巴塞隆拿有興趣接貨。