有心有力　39歲占士米拿續約1年

英超球隊白禮頓宣布，同中場占士米拿續約1年至2026年6月，意味呢位39歲英格蘭老將職業生涯可以跨越40歲大關，果然有心有力。

占士米拿兩年前離開效力咗8年嘅利物浦，加盟白禮頓，兩季合共僅上陣24場，主因係上季長期養傷，但會方仍然願意留住佢。領隊靴斯拿對占士米拿讚不絕口：「好高興占士下季繼續留隊，佢嘅經驗對於球隊非常重要，尤其是可以幫到年輕球員。」

占士米拿可以話係球壇傳奇，16歲已經為列斯聯上陣踢英超，2002年12月以16歲零356日，一度成為英超史上最年輕入波球員，直至2005年被當時愛華頓前鋒占士禾漢打破紀錄。

占士米拿曾效力紐卡素、阿士東維拉等球隊，並協助曼城、利物浦奪得英超冠軍，職業生涯累積踢638場英超，史上僅次於踢653場嘅前曼城中場巴利，占士米拿續約後，有望打破巴利嘅紀錄。