小保加「罪犯」中堅終獲簽證　趕及踢世冠盃

小保加中堅艾頓哥斯達早前被翻舊帳，曾經參與搶劫，世冠盃東道主美國一度拒絕向佢發出簽證，面臨無法入境參賽，幸好經過交涉後，當局向艾頓哥斯達批出26日特別簽證，可趕及出戰周二(17日)凌晨對賓菲加。

據悉現年25歲嘅艾頓哥斯達2018年效力獨立隊青年軍期間，涉嫌喺阿根廷參與一單搶劫案件，2年前獲判緩刑，唔需要坐監。特朗普當選美國總統之後，實施更加嚴格嘅入境管制，艾頓哥斯達有犯罪前科，因而一度申請唔到美國簽證。

小保加方面經過3次向美國當局解釋後，成功說服對方「開綠燈」，艾頓哥斯達獲得26日特別簽證，可以留喺美國完成整項賽事。艾頓哥斯達今年1月由比甲球隊安特衛普轉投小保加，成為球隊正選，解決簽證問題後，教練米基爾羅素可以鬆一口氣。