明搶曼聯10號　根夏：我同朗尼好相似

曼聯新簽前鋒馬菲奧斯根夏接受球會官網訪問時表示，一直視前紅魔鬼隊長朗尼為偶像，仲話自己同呢位英格蘭名宿風格非常相似，輿論解讀認為呢位巴西國腳希望獲得10號球衣，繼承朗尼衣缽。

馬菲奧斯根夏話：「我記得最初睇曼聯比賽，就好鍾意朗尼，講到踢波方面，我同佢有好多相似地方，大家都係無時無刻搏到盡，當時佢着10號，每個人都喜歡佢，成為好多球員嘅學習榜樣。」

馬菲奧斯根夏效力狼隊時期着10號，有傳如果曼聯成功出售拉舒福特，就會將10號波衫交畀根夏，現時佢開腔話「喜歡」10號，似乎已經等唔切「福仔」走人，就想將呢件戰衣據為己有。