羅拔臣同馬體會密斟　同阿諾特做鄰居

利物浦今夏大執位，繼右閘阿歷山大阿諾特轉投皇家馬德里後，左閘安德魯羅拔臣亦獲馬德里體育會垂青，據報雙方已經進行斟介，羅拔臣亦有意去西甲搵食，有望同老友阿諾特喺馬德里做鄰居。

權威記者羅曼諾爆料：「馬體會已將羅拔臣視為左閘最理想人選，不過利物浦好重視佢，呢單交易唔容易。據悉羅拔臣亦好想去馬體會，初步斟介已經展開。」羅拔臣同利物浦只剩1年合約，而「紅軍」亦接近完成收購般尼茅夫左閘米路斯卻基斯，預料羅拔臣若果留隊亦會失去正選席位。

31歲嘅羅拔臣喺8年前由侯城加盟利物浦，被譽為英超最佳左閘之一，早前阿諾特宣布轉會皇馬，羅拔臣亦感人留言話會「想念我嘅最好朋友」，估唔到下季有機會一齊喺馬德里落班，甚至會喺打吡戰正面交鋒。