簽麥比奧莫有阻滯　曼聯轉移目標斟古華特

曼聯簽入狼隊射手馬菲奧斯根夏之後，原本想收購埋賓福特前鋒麥比奧莫，但最新消息指熱刺加碼搶奪呢位喀麥隆國腳，好可能成功「截胡」，紅魔鬼惟有轉移目標，力斟般尼茅夫「星二代」祖斯甸古華特。

曼聯曾經計劃以4,200萬鎊買入麥比奧莫，熱刺決定加碼搶人，開出6,500萬鎊(約6.9億港元)轉會費，紅魔鬼財政欠佳，爭唔過呢支倫敦球隊。根據《Caught Offside》爆料，曼聯改為打祖斯甸古華特主意，呢位26歲荷蘭國腳屬於名將之後，爸爸古華特曾效力AC米蘭、巴塞隆拿等勁旅，現時擔任印尼國家隊主帥。

祖斯甸古華特盡得老竇真傳，今季為般尼茅夫上陣39場入13球及8次助攻，並且可以勝任翼鋒及前鋒，技術非常全面，適合曼聯主帥魯賓艾摩廉嘅343陣式戰術。

據悉般尼茅夫要求最少4,000萬鎊轉會費，先至會出售祖斯甸古華特，遠高於2年前900萬鎊買入價。據悉紐卡素都有興趣簽入祖斯甸古華特，曼聯要將呢位「星二代」收歸旗下，並非易事。