祖漢杜蘭想逃離沙特　曼聯機會來了

沙特阿拉伯豪門艾納斯今年1月底斥資6,400萬鎊(約6.8億港元)收購阿士東維拉射手祖漢杜蘭，根據英國媒體《TEAMtalk》最新消息，呢位21歲哥倫比亞國腳因為唔適應當地生活環境及足球文化，萌生離隊念頭，可能重返英超，曼聯、阿仙奴、車路士、韋斯咸都有興趣接貨。

祖漢杜蘭效力阿士東維拉期間有出色表現，加上非常年輕，當時佢選擇去沙特挖金，令外界大感意外。呢位前鋒為艾納斯上陣18場入12球，但原來佢一直未能適應當地生活，英國《太陽報》曾經指沙特法律禁止未婚情侶同居，祖漢杜蘭選擇同女朋友喺巴林居住，每日需要坐80分鐘飛機去沙特首都利雅得參加操練，造成不便，結果僅過半年，佢頂唔順想「逃亡」。

消息傳出後，立即引起多支英超球隊關注，尤其是曼聯、阿仙奴、車路士正在物色前鋒，祖漢杜蘭擁有英超成功經驗，自然屬於佳選。至於韋斯咸1月已向維拉提出收購祖漢杜蘭，但被艾納斯「截胡」，現時想再出手邀請佢加盟。艾納斯唔會蝕本出售祖漢杜蘭，估計起碼要收回6,400萬鎊成本價，先至有得傾。