冇份踢世冠　基爾獲加狂叫中式外賣

英格蘭國腳基爾獲加近1年表現倒退，早前更被曼城踢出世冠盃大軍，呢位35歲老將放假期間胃口極好，有中式餐館老闆大爆基爾獲加狂叫外賣，一張外賣單就有341.6鎊，絕對係大客仔。

位於柴郡嘅中式餐館萬利，一向有唔少球星幫襯，老闆日前喺社交網分享同基爾獲加合照，而且仲有張極豐富嘅外賣訂單，老闆留言表示：「我好開心基爾獲加再一次嚟食中餐。」

睇番基爾獲加嘅「柯打」，單係全隻嘅香酥鴨就叫咗3隻，揚州炒飯、牛肉飯等亦叫咗7份，仲有京都骨、蜜糖骨、椒鹽蝦、椒鹽雞翼、咖哩雞等等菜式，成張單總值341.6鎊。

基爾獲加嘅外賣曝光後，唔少球迷就抽水，指被爆出有私生子嘅基爾獲加，依家要餵飽兩頭住家同成竇仔女，叫咁多外賣都好正常喎！