勇不可擋！PSG大破馬體會　安歷基認冠軍大熱

歐聯冠軍巴黎聖日耳門(PSG)勇不可擋！周一(16日)凌晨世冠盃B組頭炮，PSG以4比0大破西甲勁旅馬德里體育會，喺2025年狂入105球，教練安歷基亦唔客氣，承認PSG絕對係世冠盃嘅冠軍大熱門！

PSG上月歐聯決賽5比0炒國際米蘭，今場世冠盃面對勁旅馬體會一樣，上半場由法比安彭拿同域天拿各入1球，尾段雖然換入多位後備，但馬體會有中堅基文迪朗格勒喺77分鐘被逐，PSG完場前再靠辛尼馬約魯同李康仁射入12碼，湊成4比0大捷。

PSG喺2025年踢36場攻入105球，超越巴塞隆拿嘅102球，成為今年入波最多嘅5大聯賽球隊。PSG主帥安歷基賽後表示：「今場踢出好完美嘅表現，由頭到尾都控制戰局，炎熱係一個問題，但我哋好快適應同集中，我以呢班球員為榮。我冇一絲懷疑，我哋絕對係今屆世冠盃嘅冠軍大熱。」