兩個只能救一個　拿玻里簽加拿祖或基亞利殊

意甲勁旅拿玻里日前成功簽入奇雲迪布尼後，教練干地繼續向英超兵埋手，左翼位置睇中阿歷真度加拿祖同基亞利殊，呢兩位「曼市棄卒」都等緊新球會打救。據報拿玻里目標稍為傾向基亞利殊，有望撮句佢同奇雲迪布尼重聚。

英國《太陽報》報道，拿玻里對兩位翼鋒虎視眈眈，今年初就曾經出價收購加拿祖，但傾唔掂轉會費告吹，報道指曼聯依家為加拿祖叫價7,000萬鎊，超出拿玻里嘅預算，不過如果冇其他球會出手，曼聯可能亦會被逼降價，傳聞車路士、阿士東維拉、利華古遜同艾納斯都密切關注。

相比之下，曼城就更有「誠意」送走基亞利殊，佢4年前加盟嗰陣係英超首個1億鎊球員，消息指曼城依家願意4,500萬鎊賣走佢，係拿玻里能力負擔得到。不過，拿玻里亦知道作為長遠投資，比基亞利殊後生9年嘅加拿祖係更好選擇，就等干地決定「打救」邊個球員。