大鑊！麥比奧莫大讚法蘭克　曼聯又食詐胡？

曼聯今個夏天重點收購新前鋒，麥比奧莫同約基利斯係兩大目標人物，不過繼瑞典前鋒約基利斯表態曼聯係「第2選擇」後，盛傳已傾掂個人條件嘅麥比奧莫，周一(16日)喺加拿大睇F1期間受訪，大讚熱刺新帥法蘭克對佢恩重如山，令球迷擔心佢會「轉軚」，曼聯隨時食詐胡。

賓福特前鋒麥比奧莫同曼聯早已傾掂數，不過賓福特叫價7,000萬鎊，令轉會陷入僵局，有傳法蘭克接掌熱刺帥印後，立即要求熱刺出手搶人。麥比奧莫周一喺加拿大睇F1，接受《天空體育》訪問表示：「法蘭克為我做咗好多嘢，由一開始就對我充滿信任，令我作為一個人同一個球員都進步好多，我肯定佢去邊都會取得成功。」曼聯另一心儀前鋒約基利斯，據報同時亦係阿仙奴嘅獵物，消息指約基利斯已表明首選係加盟阿仙奴，只有阿仙奴退出爭奪，佢先至會考慮曼聯開出嘅聘約。

曼聯早前已簽入巴西前鋒馬菲奧斯根夏，不過佢預計會出司進攻中場或「9號半」位置，領隊魯賓艾摩廉仍想簽入一位多產射手，但隨住收購麥比奧莫同約基利斯計劃出現阻滯，消息指依家會打法蘭克福前鋒伊基迪基主意。