【有片】戴納首演交助攻 車路士旗開得勝
周二(17日)凌晨世冠盃D組，英超勁旅車路士以2比0擊敗FC洛杉磯，旗開得勝。月初加盟嘅英格蘭前鋒利安戴納，今場首演後備上陣即交出助攻，領隊馬利斯卡大讚佢極速融入球隊，利安戴納就表明唔滿足於交助攻，有信心盡快拎到「處子球」。
今場比賽喺可以容納7萬幾人嘅平治體育館，但入場數字只得2.2萬，場面冷清。車路士強陣出擊，33分鐘尼高拉斯積遜長傳，柏度尼圖禁區內扣過敵衞抽入近柱。利安戴納喺64分鐘上陣表現活躍，77分鐘右路交出靚傳中，安素費南迪斯趕到近門射入，助車路士贏2比0。
車路士領隊馬利斯卡賽後表示：「好好嘅戰果，喺球季呢個階段一定有好多問題，但整體演出理想。戴納嘅最大優點，係佢熟悉我哋嘅踢法，所以好快就融入球隊，達里奧艾素高今場亦都首演，對佢哋兩個嚟講係好好嘅比賽。」
着9號波衫嘅戴納第1場就交助攻，不過佢就更想入波：「我好開心，亦好興奮為車路士首次上陣，而且仲有貢獻。球隊上下都好歡迎我，我只係練咗幾課，能夠幫助球隊(交助攻)當然好，但我都想自己入番幾球波。」