32%入座率極冷清　車仔慘成「票房毒藥」

英超豪門車路士擁有多位球星，但卻欠缺號召力，周二(17日)凌晨世冠盃D組對FC洛杉磯，可容納7萬名觀眾嘅球場，只有22,137人入場睇波，出現大量空凳，場面甚為尷尬。

今仗係英格蘭同美國球會首次正式賽事交鋒，車仔球員身價總值達10.5億歐元，FC洛杉磯亦有2位前英超球星基奧特、洛里斯助陣，但吸引唔到球迷入場，入座率僅32%，據悉由於開賽時間係當地下午3點，好多人返緊工，導致票房失收。

車路士領隊馬利斯卡亦唔滿意場面冷清：「氣氛同環境有啲奇怪，球場幾乎係空蕩，如果對手係一支巴西球隊，應該可以吸引更多人入場，下場對法林明高，氣氛應該唔錯。」呢位意大利名帥似乎認為FC洛杉磯先至係「票房毒藥」。其實早前有報道指世冠盃門票滯銷，部分波飛劈價達84%促銷，但情況並冇明顯改善。