【有片】「球證鏡頭」大受歡迎　英超有望引入

今屆世冠盃賽事吸引力一般，不過首次喺大賽出現嘅「球證鏡頭」就大受歡迎，令睇直播嘅觀眾可以用「第一身」視覺去睇比賽。車路士球星柏度尼圖對FC洛杉磯開紀錄嘅入波，「球證鏡頭」曝光後大獲好評，英超入考慮全面引入。

今屆世冠盃球證身上都安裝鏡頭，揭幕戰國際邁亞密對艾阿里雖然冇波入，但DAZN首次公開一次黃牌事件嘅「球證鏡頭」，就令球迷覺得好新鮮。今場車路士第1個入波，「球證鏡頭」就清楚睇到組織嘅流暢，同埋柏度尼圖嘅個人技術，如置身現場。

「球證鏡頭」睇柏度尼圖入波：https://x.com/i/status/1934705987254145246　

「球證鏡頭」近年開始出現，美職就喺明星賽用過，而英超喺上年亦都試用，水晶宮5月大勝曼聯一仗就有「球證鏡頭」曝光，但唔係用嚟公開播放。英格蘭足總主席亦倡議全面引入「球證鏡頭」，因為除咗「好睇」之外，仲有其他實際用途。

依家「球證鏡頭」主要出現喺草根賽事，用意係防止球證受到滋擾，事實上呢個鏡頭可以保護球證之外，亦有助增加球證判決嘅透明度，畀球迷知道球證喺現場見到啲乜，甚至多一個鏡頭幫助VAR團隊執法，絕對係百利而無一害。