咩玩法？前曼聯硬漢受傷+紅牌

周二(17日)早上世冠盃C組，小保加打和賓菲加2比2，戰況非常火爆，雙方合共有3位球員食紅牌，效力小保加嘅前曼聯中場安達靴里拉比賽早段傷出，其後不滿球證判決，作出激烈抗議，被出示紅牌，遭到雙重打擊。

兩隊一開波就鬥攻，賓菲加前鋒阿文度布馬曾經射門中柱彈出，小保加避過一劫，果然有後福，21分鐘由前鋒米基爾米倫迪爾射入打開紀錄，僅過6分鐘，中場洛迪高巴達利亞頂入成2比0。

戰至上半場尾段，賓菲加中堅奧達文迪迎頂角球，遭對手踢跌，球證睇完VAR後判罰12碼，20分鐘已受傷退下線嘅安達靴里拉喺後備席作出激烈抗議，結果換來1張紅牌，賓菲加由老將迪馬利亞主射入網追至1比2。

換邊後，賓菲加立即作出調動，換入前鋒比洛迪，但呢位31歲意大利國腳踢咗25分鐘，因為舉腳過高，踢中對手頭部，被球證直接出示紅牌趕出場，亦係佢職業生涯首次被逐，幸好球隊靠奧達文迪建功扳平2比2。臨完場前，小保加再有中堅費加食紅牌，但對賽果已經冇影響。