莫耶斯鍾情老將　愛華頓搶簽基爾獲加

基爾獲加冇份入選曼城出戰世冠盃大軍名單之後，意味領隊哥迪奧拿已無意留用呢位35歲老將，佢準備定執包袱。根據英國《每日郵報》爆料，愛華頓出手搶簽基爾獲加，填補39歲後衞艾舒利楊格離隊後嘅空缺，似乎領隊莫耶斯鍾情老將。

基爾獲加今年1月底被曼城外借去AC米蘭，由於表現欠佳，呢支意甲勁旅放棄買斷佢，惟有重返曼城，但同樣被哥帥棄用，離隊成為唯一出路。愛華頓早前已接觸基爾獲加，呢位右後衞亦同意加盟「拖肥糖」，如無意外將簽約1年。惟一變數係愛華頓仍未決定是否直接買斷基爾獲加，抑或借用1年。除咗愛華頓之外，富咸亦有興趣簽入基爾獲加。

基爾獲加效力曼城8年，獲得17項錦標，包括6次捧英超及1次歐聯冠軍，亦協助英格蘭2次打入歐國盃決賽，但都屈居亞軍。