曼聯拒賣雙星波衫　拉舒福特留隊有彎轉？

曼聯今個暑假準備大換血，3大翼鋒拉舒福特、安東尼馬菲奧斯同查頓辛祖，預料都會被賣走，但曼聯官方商店最近出售25/26球季主場波衫，似乎就有所「暗示」，其中查頓辛祖同安東尼嘅波衫並冇「上架」，不過拉舒福特件10號就有得賣，唔通「福仔」留隊仲有彎轉？

3位翼鋒都喺今個月結束外借，查頓辛祖被車路士「退貨」；安東尼想留喺貝迪斯，但轉會費未傾掂；拉舒福特由阿士東維拉返嚟後，想去巴塞隆拿又未成事。依家球迷去曼聯官方商店訂製新波衫，已經冇查頓辛祖同安東尼嘅選項，事實上查頓辛祖之前着嘅25號，已被曼紐爾烏加迪拎走，而安東尼件21號雖然懸空，但曼聯亦冇提供呢個選擇。

不過，同曼聯仲有3年合約嘅拉舒福特，佢件10號就意外出現喺波衫售賣名單上面，同查頓辛祖、安東尼嘅待遇有明顯區別。拉舒福特前年同曼聯續約到2028年，周薪達到32.5萬鎊，唔係太多球會負擔得起。