祖記執到寶　將買斷最強「星二代」

祖雲達斯上年8月向波圖借用翼鋒法蘭斯高干斯卡奧，呢位22歲葡萄牙國腳有出色表現，上陣37場入5球及6次助攻，祖記準備以3,000萬歐元(約2.7億港元)買斷呢位「星二代」。

法蘭斯高干斯卡奧嘅爸爸係前AC米蘭教練沙治奧干斯卡奧，虎父無犬子，「細干」首季登陸意甲，雖然未能穩坐正選，但每次有機會上陣，都交足功課，代表作一定2月意甲主場對國際米蘭，射入全場唯一入球，協助祖記擊敗勁敵。另外，早前歐國聯4強葡萄牙對德國，法蘭斯高干斯卡奧射入世界波，成為贏波功臣。

法蘭斯高干斯卡奧神勇表現，已經吸引唔少大球會注意，根據借用條約，祖雲達斯有權喺6月15日至7月15日期間以3,000萬歐元買斷「細干」，會方即將出手收購，以免被其他豪門「截胡」。