PSG「低調哥」成搶手貨　皇馬又想挖角

法甲豪門巴黎聖日耳門(PSG)球星如雲，但正選人腳之中，卻有1位少人認識嘅「低調哥」，就係中堅威廉柏曹。呢位23歲厄瓜多爾國腳屬於球隊奪得「三冠王」嘅無名英雄，現時已引起皇馬注意，準備出手挖角。

威廉柏曹2022年1月登陸歐洲球壇，加盟比利時球隊安特衛普，2年前轉投德甲球隊法蘭克福，憑準繩攔截及傳球能力，嶄露頭角。PSG上年8月豪花4,000萬歐元(約3.6億港元)收購威廉柏曹，佢不負所望，成為防線關鍵人物。皇馬正在物色新中堅，近日再次向「冤家」PSG球員埋手，想簽入威廉柏曹。

PSG教練安歷基被傳媒問到威廉柏曹去留問題時，佢幽默回應：「有球會睇中PSG球員，其實好正常，但我哋嘅人好難被帶走。」威廉柏曹仲有4年合約在身，加上皇馬搶走基利安麥巴比一事，已經得罪咗PSG，相信呢支歐聯冠軍絕對唔會再畀「銀河艦隊」挖角得手。