祖比上演多蒙特處子戰　遭「爸爸級」對手凍結

周三(18日)凌晨世冠盃F組，富明尼斯同多蒙特打和0比0，但亦不乏亮點，多蒙特新簽19歲中場祖比比寧咸首次為「蜜蜂兵團」上陣，遇上巴西老將中堅堤亞高施華，兩人年紀相距21歲，猶如「父子對決」。

多蒙特球員戰意不足，幾乎全場捱打，全靠門將基哥高保有出色發揮，先至力保不失。踢到59分鐘，球迷最期待畫面出現，祖比比寧咸後備上陣，大家都想睇下佢能否重演哥哥祖迪比寧咸當年效力多蒙特嘅精彩演出。不過，呢位英格蘭新星仍然需要時間融入「蜜蜂兵團」，踢咗超過半個鐘冇乜建樹，尤其是遇上堤亞高施華，更加冇機會「偷雞」。

現年40歲嘅堤亞高施華寶刀未老，今場9次單對單成功攔截對手，7次解圍，10次爭頂8次勝出，有佢鎮守防線，亦係兩隊互交白卷嘅原因之一。值得一提，今屆3場歐洲球隊對南美球隊，都打成平手，可見當今兩大足球勢力旗鼓相當。