拉莫斯建功　破世冠盃最大年齡入波紀錄

周三(18日)早上世冠盃E組爆出冷門，墨西哥球隊蒙特雷以1比1打和歐聯亞軍國際米蘭，今年2月加盟蒙特雷嘅西班牙中堅沙治奧拉莫斯頭槌破網，以39歲零79日成為世冠盃史上最大年齡入波球員。

包括「舊版」世冠盃在內，今屆係沙治奧拉莫斯第5度參加呢項大賽，前4次為皇馬出戰都奪冠而回。呢位「世冠王者」今仗又做主角，開賽25分鐘，迎頂角球入網，為蒙特雷打開紀錄，佢入波後做出C朗招牌SIU慶祝動作，似乎想向呢位前皇馬隊友致敬。

沙治奧拉莫斯職業生涯已累積4個世冠盃入波，佢今次建功，正好打破對手國際米蘭名宿辛尼迪2010年創出嘅世冠盃最大年齡入波球員紀錄(37歲零127日)。

沙治奧拉莫斯為蒙特雷各項賽事上陣9場入4球，入球率可媲美前鋒，可惜蒙特雷未能保住勝果，國際米蘭上半場尾段，憑拿達路馬天尼斯入波扳平1比1，換邊後雙方未能增添入球，最終打和1比1。