格連活特重返曼市　真相原來係咁

馬賽翼鋒格連活特現身曼徹斯特，但並唔係返曼聯，而係搵前紅魔鬼青年軍隊友迪文尼美羅一齊操練，希望保持狀態，呢位昔日「壞孩子」現時非常生性。

格連活特上年夏天正式離開母會曼聯，轉投法甲勁旅馬賽，並且有出色表現，各項賽事上陣36場射入22球及6次助攻，協助馬賽獲得聯賽亞軍，可以參加下屆歐聯。反觀曼聯鋒線疲弱，僅排英超15位，令「魔迷」更加懷念格連活特，佢今次返回曼徹斯特，仍然深受球迷關注，甚至希望佢回巢紅魔鬼。

不過，格連活特純粹搵老友迪文尼美羅一齊練波，兩人曾經係曼聯青年軍隊友，事業發展有好大分別，現年24歲嘅迪文尼美羅從未為曼聯踢過英超，3年前離隊後，轉投英甲球隊韋甘比，但亦不獲重用，大部分時間被外借，現時只能效力第6級別聯賽球隊馬爾斯菲。