馬體會防線崩潰　施蒙尼講明想簽羅美路

馬德里體育會上場世冠盃慘吞巴黎聖日耳門4蛋，以往固若金湯防線蕩然無存，教練施蒙尼亦已計劃今夏收購後衞，現時罕有公開講明想簽入熱刺中堅基斯甸羅美路。

熱刺領隊普斯迪高路早前被炒後，盛傳引起部分主力不滿，甚至有意離隊，包括基斯甸羅美路，加上呢位27歲阿根廷國腳曾經透露想去西甲搵食，外界推測佢好可能轉投馬體會，追隨同胞施蒙尼。

施蒙尼近日被阿根廷媒體《ole》問到是否有興趣簽入基斯甸羅美路，佢直認不諱：「梗係想啦，羅美路係1位偉大球員。」球隊主帥一般唔會公開指明想簽邊位球員，施蒙尼開腔承認想簽羅美路，可見成事機會甚高，據悉熱刺要求6,000萬歐元(約5.4億港元)轉會費。

除咗基斯甸羅美路之外，馬體會亦睇中利物浦左後衞安德魯羅拔臣，施蒙尼似乎有意打造「英超防線」。