伊蒂哈德斟孫興民　人工多5倍

剛協助熱刺贏得歐霸盃冠軍嘅隊長孫興民，正受沙特豪門伊蒂哈德力斟，據報對方開出4,000萬歐元轉會費(約3.6億港元)畀熱刺，人工係孫興民現時5倍，成事機會唔低。

孫興民效力熱刺10年，今季贏得歐霸盃已經圓捧盃夢，而且年屆32歲年紀唔細，球會由新帥法蘭克領軍將進入新時代，尚餘1年合約嘅孫興民勢必離隊。

英國傳媒報道，孫興民原本與費倫巴治談判轉會，近日伊蒂哈德介入，開出令人無法拒絕條件，令轉會談判大轉向。

熱刺今夏出售孫興民叫價3,000萬歐元(約2.7億港元)，但伊蒂哈德第一口價已經去到4,000萬歐元，比熱刺要求仲要多出1,000萬歐元。

至於孫興民人工，在熱刺稅前年薪為1,000萬歐元，伊蒂哈德卻開出稅後年薪3,000萬歐元，計埋稅率，人工比現時多5倍，仲有得同賓施馬、尼高路簡迪等頂級球星合作，無論熱刺或孫興民都難以拒絕。