科頓1射1傳率曼城贏波 利維斯踢頭被逐
曼城喺周四(19日)凌晨世冠盃打響頭炮，憑住菲爾科頓1射1傳，2比0輕取韋達卡薩白蘭卡，美中不足係小將歷高利維斯完場前飛鏟，踢中對方頭部被逐離場。
曼城今場派出兩名新兵雷恩達斯同卓基擔正，不過鋒芒就由菲爾科頓搶晒，開波唔夠2分鐘，菲爾科頓就趁對方門將撲救後，搶點補射破網。42分鐘菲爾科頓開出角球，謝利美杜古接應窩利射成2比0。
寓賽於賽嘅曼城，下半場換入艾寧夏蘭特同洛迪卡斯簡迪等主力，但遲遲未增添紀錄，88分鐘更有歷高利維斯鏟波後，收唔切掣踢中對方頭部，被球證直接出示紅牌，幸踢少1個無阻曼城贏2比0。
哥迪奧拿賽後對紅牌有所微言：「利維斯鏟中個波，以當時嘅速度，佢絕對冇心踢傷人，而且又係貼住草地。不過球證有唔同睇法，佢係話事人，我哋只能夠接受。」