阿仙奴買中堅　睇中「新馬加希斯」

阿仙奴夏季轉會仍然未有動靜，不過物色行動就一直進行，據報佢哋打算再簽一名中堅，依家睇中巴西新晉國腳阿歷山度，阿仙奴同里爾已經進行初步接洽，有機會引入呢位「新馬加希斯」。

阿仙奴近年成績理想，威廉沙列巴同加比爾馬加希斯呢對中堅組合居功至偉，領隊阿迪達打算再引入一名頂級中堅替換，可惜早前收購西班牙國腳甸恩胡積臣失敗，依家就轉移目標去阿歷山度身上。

效力里爾嘅阿歷山度上季表現突出，月初更獲安察洛堤選入巴西國家隊，而且連續2場出任正選。據巴西媒體《UOL》報道，阿仙奴同拿玻里都對佢好有興趣，前者更已進行初步接觸。

阿仙奴5年前用2,700萬鎊向里爾收購馬加希斯，呢單轉會證實物超所值，依家再打另一位喺里爾「上位」嘅巴西中堅主意，希望可以複製成功個案。