英足總正式起訴梅迪歷　面臨停賽4年

車路士翼鋒梅迪歷上年底被揭發藥檢失敗，自11月開始已經冇再上陣，英格蘭足總周四(19日)宣布，正式起訴呢位烏克蘭國腳違反禁藥條例，若果罪名成立，最高可被罰停賽4年，足球生涯隨時玩完。

現年24歲嘅梅迪歷，被指喺上年10月一次藥檢入面，尿液中驗出禁藥米曲胼。網球名將舒拉寶娃喺2016年亦係「衰」喺呢種禁藥，一度被停賽2年(上訴減刑至15個月)。梅迪歷之後曾發表聲明，話自己係喺全不知情下誤服禁藥。

英格蘭足總近日檢查個藥檢「B樣本」後，正式向佢提出起訴，最高刑罰為停賽4年。梅迪歷喺2年前以1億歐元轉會費加盟車路士，合約簽到去2031年，就算佢真係被罰停賽4年，刑滿之後同車仔仍有2年合約，不過佢件10號波衫最近已被高爾彭馬拎走，依家連球衣號碼都未獲分配，前景堪憂。