利華古遜斟利物浦中堅　分開獨立處理

利物浦力斟科利安華迪斯進入最後階段，就快完成天價交易，據報同時間利華古遜正密斟利物浦中堅查洛爾昆沙，講明係分開獨立處理，兩宗交易唔會撈亂。

英國傳媒報道，利物浦同利華古遜談判科利安華迪斯期間，曾經傳出利華古遜要求將查洛爾昆沙同哈維艾利洛加入交易，但因為交易太複雜，雙方之後冇再提，利華古遜決定將斟介查洛爾昆沙一事獨立處理，避免影響科利安華迪斯談判。

22歲嘅查洛爾昆沙係利物浦青訓產品，曾外借布里斯托流浪，前年回收後開始獲上陣機會，為紅軍上陣58場入3球，大部分時間擔任後備，只要華基爾雲迪積克同伊巴希馬干拿迪冇病冇痛，佢都好少機會上陣。

利物浦去年10月同昆沙續5年長約，但近日被利華古遜新帥坦哈格睇中，據報開價3,000萬鎊(約3.18億港元)，雙方正在談判，但唔會影響科利安華迪斯交易。