彭美拉斯輕取艾阿里　車路士「執到寶」

周五(20日)朝早世冠盃A組，巴甲勁旅彭美拉斯2比0輕取艾阿里，不過最開心嘅可能係車路士球迷，事關世冠盃後將轉會車仔嘅18歲新星艾斯迪華奧繼續有好表現，連續第2場獲選為MVP，車路士似乎「執到寶」。

彭美拉斯今場控制戰局，換邊後4分鐘靠對手擺烏龍領先，59分鐘荷西盧比斯再下一城，輕鬆贏2比0全取3分。右翼艾斯迪華奧今場雖然冇入波又冇助攻，但表現相當活躍，為對手製造極大威脅，賽後再次獲選為MVP。

車路士早喺上年已宣布用2,900萬鎊簽入艾斯迪華奧(連獎金條款可達5,100萬鎊)，將會喺世冠盃後正式加盟。18歲嘅艾斯迪華奧已經5次為巴西國家隊上陣，最近亦獲安察洛堤選入國家隊大軍，被視為球壇最有潛質新星之一。