查漢奴古「愛回家」　國米急斟巴西硬漢

根據意大利傳媒報道，國際米蘭中場查漢奴古可能今夏離隊，加盟祖國土耳其勁旅加拉塔沙雷，會方開始物色接替人選，計劃收購阿特蘭大中場艾達臣荷西作為接班人。

現年31歲嘅查漢奴古4年前由AC米蘭轉投國際米蘭，一直穩坐正選，至今上陣182場入38球及32次助攻，協助國米奪得1次意甲及2次意大利盃冠軍。呢位中場指揮官近年獲得唔少大球會垂青，德甲冠軍拜仁慕尼黑上年夏天曾經打算收購佢，今次輪到加拉塔沙雷出手。

雖然查漢奴古係土耳其國腳，但佢本身喺德國出身，亦從未效力過土耳其球隊，可能有興趣「衣錦還鄉」，查漢奴古仲有2年合約，國米要求4,000萬歐元(約3.6億港元)轉會費。

國米方面亦為查漢奴古離隊做好準備，計劃收購艾達臣荷西，呢位即將26歲嘅巴西國腳3年前加盟阿特蘭大，今季上陣49場入5球及2次助攻，曾經傳出曼聯有意簽入佢，國米現時可能出手「截胡」，阿特蘭大將艾達臣荷西標價為6,000萬歐元(約5.4億港元)。