沙治奧拉莫斯長青秘密　靠高科技養生

墨超球隊蒙特雷喺世冠盃有驚喜，首仗就打和歐洲勁旅國際米蘭，西班牙老將沙治奧拉莫斯更成為入球功臣，呢位39歲老將能夠一直保持高水平表現，全賴高科技養生！

沙治奧拉莫斯加盟蒙特雷後，10場比賽已入5球，數字相當驚人，佢喺背後嘅努力同付出就係最大原因。據報沙治奧拉莫斯為保持最好身體狀態，投資數萬歐元去添置儀器同人手去做養生。

報道指沙治奧拉莫斯平時練習後，除咗基本接受理療師嘅按摩，以及浸冷熱交替浴外，亦會做桑拿同瞓高壓氧治療艙，最特別係佢仲引入埋光生物調節儀器，用紅外光刺激細胞做治療。

據報專門研發光生物調節科技嘅公司Aureo Lifestyle，創辦人之一就係沙治奧拉莫斯前隊友馬高斯洛蘭迪，呢個好可能就係沙治奧拉莫斯長青秘密。