【官宣】華迪斯加盟利物浦　下月同香港球迷見面

千呼萬喚之下，利物浦正式宣布簽入利華古遜中場科利安華迪斯，據悉雙方簽約5年，轉會費達到破英超紀錄嘅1.165億鎊(約12.3億港元)。呢位22歲德國國腳表示，之前拒絕兩大豪門拜仁慕尼黑、皇馬邀請，並選擇加盟利物浦，主因係希望接受新挑戰，並認為英超屬於世界上競爭最激烈聯賽，令佢想參與其中，更揚言每年都要為紅軍捧盃。

科利安華迪斯獲得多間大球會垂青，更一度傳出拜仁慕尼黑已經斟掂佢，但最終情歸利物浦，華迪斯解釋投「軍」原因：「我想要一個全新環境，所以離開德甲，並登陸英超，相比留喺德甲踢拜仁，或者去西甲加盟皇馬，我更加想喺英超呢個世界競爭最激烈聯賽證明自己，利物浦係世界上最佳三大球會之一，非常吸引我。」華迪斯仲話來到利物浦，並非為開心，而係要每年奪取冠軍。

利物浦將於7月21日飛抵香港進行季前操練，首場熱身賽將於7月26日鬥意甲勁旅AC米蘭，意味香港球迷有機會一睹呢位英超史上最高身價球員表現。

利物浦早前已簽入另1位利華古遜球員謝利美費林邦，加上科利安華迪斯，兩人轉會費合共達到1.46億鎊，紅軍增兵行動仍然未結束，下一步可能以4,000萬鎊收購般尼茅夫左後衞米路斯卻基斯。