咩玩法？皇馬出動無人機幫手操練

皇馬上場世冠盃大熱倒灶僅打和希拉爾1比1，根據西班牙《馬卡報》爆料，「銀河艦隊」失利之後，新帥沙比阿朗素首次使用無人機幫手操練，希望更有效收集球員數據，從而作出改善及針對性部署。

皇馬之前由安察洛堤擔任主帥，以及沙比阿朗素執教利華古遜時期，都冇用過無人機幫手，沙比仔近日決定使用創新方法輔助訓練。據悉皇馬教練團有專人負責操作無人機，從鳥瞰角度拍攝球員訓練過程，收集走位、速度、隊型等數據，然後作出分析，搵出問題所在，加以糾正。

另外，過去一季備受傷患困擾嘅中場卡馬雲加康復進度比預期快，已經可以參加部分操練，有機會復出踢世冠盃最後1輪分組賽對薩爾斯堡。至於日前因為急性腸胃炎，送院治理嘅前鋒基利安麥巴比已經出院，但未知能否踢下周一(23日)凌晨世冠盃對帕丘卡。