【官宣】曾被老闆照肺　森林主帥紐奴續約

諾定咸森林周六(21日)官方宣布，與主帥紐奴完成續約，合約簽到2028年，雖然森林今季由本來踢歐聯到最後排名下跌至踢歐協聯，季尾紐奴更被老闆馬連拿基斯當眾「照肺」，但最後佢都獲留隊並續約，可見仍然受器重。

森林喺官方公告中指出，紐奴今季領軍表現出色，包括55年來首次作客擊敗利物浦、30年來首次作客擊敗曼聯，以及取得1967年以來頂級聯賽最長連勝紀錄，並3度當選最佳領隊，都係對佢嘅認可。

較為可惜嘅係，森林原本好有機會取得歐聯席位，但到季尾成績急跌，最終跌至第7名，僅獲得歐協聯參賽資格，同歐聯席位有好大落差。

森林上月中主場打和李斯特城後，班主馬連拿基斯衝落球場，對紐奴激烈責罵，不過下咗啖氣之後仍然同紐奴續約，可見紐奴真係教得好。