奧維多相隔24年重返西甲　40歲卡索拉寫足球童話

周日(22日)凌晨西乙升班附加賽決賽，奧維多戲劇性喺加時擊敗米蘭迪斯，相隔24年後重返西甲。已經40歲嘅前阿仙奴球星辛迪卡索拉，由8年前重傷幾乎要截肢保命，到2年前拎「最低工資」為瀕臨破產嘅母會奧維多效力，今屆4強同決賽都射入救命波成為升班英雄，書寫最動人嘅足球童話！

西乙排第3位嘅奧維多，2星期前喺升班附加賽4強次回合，由傳奇卡索拉轟入罰球，得以3比2淘汰艾美利亞。決賽首回合0比1不敵米蘭迪斯後，奧維多喺周日次回合早段再輸1球，不過卡索拉39分鐘冷靜射入12碼揭開大反擊序幕，奧維多再喺下半場同加時連入2球，戲劇性反勝3比2升上西甲。

完場後過千名奧維多衝入球場，衝向卡索拉擁抱慶祝。呢位40歲名將喺奧維多青訓出身，曾效力阿仙奴6季被譽為英超最佳中場之一，可惜2016年開始受傷患折磨，試過1年內做8次足踝手術，更因細菌感染一度憂慮要截肢，最後要喺手臂「借皮」覆蓋傷口，包括有女兒名字紋身嘅皮膚被移植到足踝。

勢估唔到咁嚴重嘅傷患，未有令卡索拉提早收山，2年前佢拎西甲法定「最低工資」(年薪9.1萬歐元)回歸奧維多。奧維多自2001年喺西甲降班後，出現財政問題拖欠薪金，2003年被罰降落丁組，近20年一直喺低組別浮浮沉沉，今季終於喺卡索拉帶領下重返西甲。

卡索拉完場後同女友激吻慶祝，佢賽後表示：「我感受到無比快樂，特別係為奧維多嘅球迷，呢間球會近年受咗好多苦，依家終於可以慶祝，多謝球迷全季嘅支持。協助奧維多升班係我人生最大嘅夢想同成就，我係世界上最幸福嘅人！」