大炒6球都開拖　賓菲加將帥激烈衝突

周日(22日)凌晨世冠盃C組出現離奇一幕，賓菲加以6比0大炒魚腩奧克蘭，雖然贏得輕鬆但氣氛繃緊，教練般盧拿治同主力奧簡高古兩度爆發激烈爭執，幾乎「講手」要勞煩其他球員制止。

奧克蘭首仗被拜仁慕尼黑狂數10球，今仗對賓菲加表現大幅改善，頂到上半場補時先被迪馬利亞入12碼攻陷。賓菲加54分鐘由柏夫利迪斯增添紀錄，但教練般盧拿治就好不滿，61分鐘將中場奧簡高古換走，呢位土耳其國腳即場大發脾氣，拒絕同般盧拿治握手並爆粗，般盧拿治激動還擊叫佢「收聲」。

入替奧簡高古嘅連拿度辛捷士，入場2分鐘就入波，般盧拿治隨即再向奧簡高古「示威」，奧簡高古亦企起身憤怒回應，兩人手指指幾乎要開拖，好在艾度路高奴將佢拉住。賓菲加尾段再入多3球，湊成6比0大捷。般盧拿治賽後批評奧簡高古「掛住自己爭入波」，並強調從來都係睇表現換人，冇任何球員會有特權。