20歲新星補時入波絕殺　捷禾執教國米首勝

周日(22日)凌晨世冠盃E組，國際米蘭憑後備上陣嘅20歲新星華倫天卡邦尼補時入波，以2比1驚險反勝浦和紅鑽，新教練捷禾領軍第2場，首嘗勝利滋味，但國米整體演出仍然欠佳，恐怕呢位羅馬尼亞少帥未來日子唔易捱。

國際米蘭上場僅逼和蒙特雷1比1，今仗同樣先失守，開賽11分鐘，浦和紅鑽由翼鋒渡邊凌磨射入打開紀錄。國米立即傾力反撲，包括拿達路馬天尼斯頭槌攻門中楣彈出，費達歷高迪馬高凌空抽射，唔中目標。

戰至78分鐘，國際米蘭終於扳平，尼高路巴列拿開出角球，拿達路馬天尼斯倒掛射入，非常精彩。眼見雙方即將握手言和，華倫天卡邦尼突然成為主角，補時2分鐘射入致勝1球，協助國米獲得寶貴3分。

賽後華倫天卡邦尼人氣急升，呢位進攻中場5年前加入國米青年軍，近2季分別被外借去蒙沙、馬賽，上年進身阿根廷大國腳，並有份出戰美洲國家盃，但佢上年10月整傷十字韌帶，長抖8個月，近期先至復操，直至對浦和紅鑽前1日，獲得軍醫批准可以上陣，估唔到立即成為國米贏波功臣，新一季有望獲得主帥捷禾留用。

至於日職球隊浦和紅鑽輸波之後，2戰2敗，已經提早篤定出局。