曼聯好消息！馬天尼斯願意成「魔」

曼聯換「門」計劃有進展，根據「轉會權威」記者羅曼諾(Fabrizio Romano)爆料，紅魔鬼接觸阿士東維拉門將達米安馬天尼斯之後，雙方已達成協議，呢位32歲阿根廷國腳同意加盟曼聯，意味現時紅魔鬼正選奧拿拿好大機會被出售。

阿士東維拉因為財政問題，準備今夏出售達米安馬天尼斯，引來多間球會關注，當中以曼聯最有興趣簽入佢，取代長期表現欠佳嘅奧拿拿。據悉達米安馬天尼斯並唔介意曼聯冇份參加下屆歐洲賽，願意協助球隊重回正軌。

不過，曼聯收購達米安馬天尼斯之前，可能需要先出售奧拿拿籌集資金，但呢位喀麥隆國腳想留隊，令紅魔鬼進退失據，而且會方要尋找買家亦唔容易，早前曾傳出有沙特阿拉伯球會希望簽入奧拿拿，最終能否完成交易，或會影響達米安馬天尼斯成「魔」可能性。