湯馬士柏迪勢離隊　阿仙奴睇中賓福特隊長

英超勁旅阿仙奴今夏中場大換血，繼意大利球星佐真奴費路離隊後，盛傳湯馬士柏迪續約談判瀕臨破滅，好可能亦會以自由身離隊。據英國《每日鏡報》報道，阿仙奴已睇中賓福特隊長基斯甸洛加特，希望佢嘅經驗可以穩定球隊中場。

合約月底屆滿嘅湯馬士柏迪，據報要求加人工續約，但阿仙奴只願意開出原有20萬鎊周薪，未來1星期會有最後定案，但情況並唔樂觀。《每日鏡報》指阿仙奴已做定準備，除咗已簽入西班牙國腳蘇比文迪之外，亦希望引入多一位經驗豐富嘅中場，代替佐真奴嘅領袖角色。

賓福特嘅丹麥國腳基斯甸洛加特就係阿仙奴心水，31歲嘅佢已喺英超打滾6年，踢法硬淨兼有控制節奏能力，而且仲係賓福特嘅隊長。基斯甸洛加特目前同賓福特仲有2年台約，但喺領隊法蘭克轉教熱刺後，一眾主力亦準備離隊，估計賓福特叫價約2,000萬鎊。