贏聯賽冠軍教波有料到　杜夫歐聯前突辭職

曾經效力車路士嘅愛爾蘭名將杜夫，4年前轉執教鞭，成為愛爾蘭球會舒爾本領隊，上年更帶領球隊重奪失落18年嘅聯賽冠軍，有機會出戰新一屆歐聯。不過舒爾本今季成績差勁，杜夫周日(22日)突然宣布辭職，令球迷驚訝。

舒爾本發聲明證實杜夫辭職消息：「杜夫執教舒爾本嘅時光令我哋好自豪，雖然球會對杜夫嘅決定感到傷心，但亦尊重佢嘅選擇。杜夫過去4年將舒爾本全面改革，佢喺球會建立嘅基礎，會引領舒爾本未來繼續走向成功。」

舒爾本上季重奪愛爾蘭聯賽冠軍，不過今季表現麻麻，依家落後榜首15分，只能爭逐歐洲賽資格。舒爾本下月將會出戰歐聯第1圈外圍賽，但杜夫嘅辭職大大影響球隊部署，球隊依家由祖爾奧拜恩暫掌帥印。46歲嘅杜夫係英超著名飛翼，曾效力布力般流浪、車路士同紐卡素等球會，亦代表愛爾蘭國家隊上陣100次。