曼聯轉會加速！用加拿祖交換尼干古

曼聯夏天組軍行動近日全面加速，轉會權威羅曼諾周二(24日)爆料，「紅魔鬼」已將收購麥比奧莫開價提高至超過6,000萬鎊，但更令球迷意外嘅係，曼聯準備同車路士進行驚天換人，用阿歷真度加拿祖交換法國前鋒尼干古，並且已為兩單交易設下限期。

曼聯月初極速簽入巴西前鋒馬菲奧斯根夏後，轉會計劃突然停滯，不過近日再度加速，羅曼諾周二報道：「曼聯已向賓福特提交新開價，總值超過6,000萬鎊，麥比奧莫仍視曼聯係首選，談判繼續進行。」曼聯新開價已符合賓福特預期，依家集中商討付款方法同獎金等細節。

更震撼嘅係，《每日電訊報》踢爆曼聯將另一前鋒目標，鎖定為車路士嘅尼干古，而車路士亦對曼聯嘅加拿祖有興趣，雙方計劃進行球員交換。負責今次轉會嘅係曼聯新「轉會總監」韋維爾，佢亦係前車路士同RB萊比錫總監，喺兩間球會都同尼干古合作過，亦係今場交易最大推手。

羅曼諾亦證實：「車路士同曼聯喺上年12月已傾過尼干古交換加拿祖，目前兩間球會未有面對面談判，但各單位都已被知會呢個計劃。」據報曼聯領隊魯賓艾摩廉希望喺集訓展開前完成鋒線重組，所以麥比奧莫同尼干古嘅收購行動要喺7月初落實，令兩人可以喺7月7日出席新球季首操。