3次12碼被無視　馬體會慘成歐洲首支出局隊

周二(24日)凌晨世冠盃B組，西甲勁旅馬德里體育會只能1比0小勝保地花高，喺同巴黎聖日耳門(PSG)、保地花高同樣得6分情況下，因得失球唔及對手慘情出局，成為今屆世冠盃首支「提早畢業」嘅歐洲球隊，而馬體會將帥賽後怒轟球證差勁執法。

馬體會今場要贏3球先可以超越保地花高，今場踢得好積極，不過祖利安艾華利斯喺上半場3次禁區內被踢跌，球證都覺得冇問題。完半場前嘅一次「12碼爭議」更有VAR介入，但球證認為有其他馬體會球員犯規在先，所以拒絕判罰。

馬體會要去到87分鐘先至由基沙文入波，但1比0嘅戰果唔足以令佢哋晉級，PSG同保地花高以B組首、次名身份晉級16強。馬體會教練施蒙尼賽後表示：「今屆所有判決都對我哋不利，今場又係咁......我唔想討論12碼嘅問題，只係想祝賀保地花高。我哋同歐聯冠軍、自由盃冠軍一樣拎到6分，對PSG嘅慘敗(0比4)決定今屆命運。」