利物浦轉會傑作！昆沙都賣到3,400萬鎊！

利物浦今個暑假積極買人，用破英超紀錄嘅1.165億鎊收購德國新星科利安華迪斯，令球迷非常驚喜，不過講神奇嘅轉會操作，佢哋日前將查洛爾昆沙賣走，以遠高於市價嘅3,400萬鎊賣畀利華古遜，就堪稱係「神操作」。

查洛爾昆沙依家為英格蘭踢緊U21歐國盃，據報利物浦已傾掂3,400萬鎊賣佢去利華古遜，令利迷嘖嘖稱奇！呢位22歲中堅上季喺施洛執教下失寵，全季英超只踢過4次正選，擺烏龍、輸12碼乜都做齊，英格蘭U21上場對西班牙U21輸嘅12碼，亦係拜佢魯莽出腳，著名網站《轉會市場》將佢身價評為1,700萬鎊，依家已兩倍價格賣出，真係要寫個「服」字。

據《The Athletic》報道，由利物浦總監升到CEO嘅米高愛華士，最擅長用高價賣走冗員，薛比雲丹貝治(2,000萬鎊賣出)、法比奧卡華路(2,750萬鎊賣出)、蘇蘭基(1,900萬鎊類出)、利安比維斯達(2,350萬鎊賣出)、佐敦伊比(1,500萬鎊賣出)等，賣出價都遠高於市價，認真犀利！