國際邁亞密「申請」次名出線　美斯倒戈PSG

周二(24日)早上世冠盃A組，國際邁亞密對彭美拉斯，雙方今場打和就可以攜手出線，結果國際邁亞密領先2球之下，被彭美拉斯逼和2比2，一齊晉級16強，難免令人懷疑兩隊踢「默契波」。尤其是國際邁亞密以小組次名出線，16強對巴黎聖日耳門(PSG)，意味美斯將會倒戈，大大增加話題性，肯定可以激刺票房收入。

國際邁亞密球王美斯今仗表現沉靜，另1位老將蘇亞雷斯做主角，開賽16分鐘，佢傳畀艾蘭迪單刀射入打開紀錄，換邊之後，蘇亞雷斯射成2比0。

不過，最後10分鐘戰局出現重大變化，彭美拉斯憑保連奴、莫斯奧各建一功，戲劇性扳平2比2。兩隊同樣有5分，彭美拉斯憑較多淨得球，獲得小組首名，16強對另1支巴西球隊保地花高。國際邁亞密以次名出線，將遇上B組首名巴黎聖日耳門。

美斯曾於2021至23年效力PSG，佢協助阿根廷喺上屆世界盃決賽擊敗法國後，被PSG球迷針對，黯然離隊加盟國際邁亞密，下仗碰頭正好趁機報仇。

至於A組另1場，波圖同艾阿里打和4比4，一齊「壯烈」出局。