志在必得　阿仙奴出頂薪搶洛迪高

根據英國媒體《TBR Football》爆料，阿仙奴正在全力爭取簽入皇馬前鋒洛迪高高斯，並願意向呢位24歲巴西國腳提供30萬鎊(約320萬港元)周薪，令佢成為兵工廠「打工皇帝」。

據悉阿仙奴領隊阿迪達為咗收購洛迪高高斯，已經展開大量工作，「銀河艦隊」方面亦願意放人，但要求起碼7,000萬鎊(約7.4億港元)轉會費，兩間球會有機會達成交易。

洛迪高高斯上季為皇馬52次披甲入14球及11次助攻，雖然皇馬新帥沙比阿朗素有意留用佢，但呢位前鋒認為自己未能成為球隊核心人物，尤其是唔可以踢最喜歡嘅左翼位置感到不滿，因而萌生去意。

如果洛迪高高斯加盟阿仙奴，阿迪達唔只可以安排佢踢左翼，仲會提供30萬鎊周薪，同佢現時人工相若，對於洛迪高高斯而言，無疑非常吸引。